‘UPV/EHUko Hezkuntzarako App Azokak. Guztiok guztiontzat sortutako teknologia’ izeneko proiektuak, Bilboko Hezkuntza Fakultateak eta Bilboko Ingeniaritza Eskolak eginak, Steam Euskadi 2023 sariketako bigarren saria jaso zuen. 

Hezkuntzarako App Azokaren azken edizioaren testuinguruan, UPV/EHUko ikasleek (Hezkuntzako Gradukoak, Telekomunikazio Ingeniaritzako Masterrekoak eta Down Sindromearen Fundazioaren Gizartea-Unibertsitatea Gelakoak) 8 app sortu zituzten, desgaitasun intelektuala duten pertsonei zuzenduta.

Hezkuntzan teknologia berrien erabilera sustatzeko eta telekomunikazio ingeniaritzaren eskutik soluzio praktikoak aplikatzeko helburuz sortu zuten proiektu hau UPV/EHUko ikasleek. “Guztiok guztiontzat sortutako teknologia” lelopean, Downen sindromea eta beste desgaitasun intelektual batzuk dituzten pertsonei eta haurrei zuzendutako mugikorretarako aplikazioak sortzea lortu zuten.

Eusko Jaurlaritzak eta Innobasquek antolatutako sari horiek Euskadin garatzen ari den STEAM Hezkuntza sustatzeko jardunbide onenak aitortzen eta bistaratzen dituzte, zientzia, teknologia, ingeniaritza eta matematika arloetako bokazio goiztiarrak bultzatzeko helburuz, arteekin eta giza zientziekin lotuta.

BISKY Team eta 'Kontuz! Ez nazazu zapaldu!'

Bestalde, 'Kontuz! Ez nazazu zapaldu!' herritar zientzien STEAM proiektuak aipamen berezia jaso zuen genero-ikuspegia modu berritzailean txertatzen duen ekimen gisa. Herritarren zientziari buruzko lankidetza proiektua da, eta euskal itsasertzari buruzko ezagutza sustatu nahi du, eskala mikroskopikoko biodibertsitatea, eta hori arriskuan jartzen duten arriskuak (plastikoak, besteak beste) ardatz hartuta. Jarri fokua hondartzara goazenean denok zapaltzen dugun hondar horretan, oinpean ditugunez jabetu gabe.

Era berean, BISKY Team-ek, beste lau proiekturekin batera, finalista izatea lortu zuen. BISKY Team-en "misioa" 100 km-ko altuerara iristen diren eta mikroesperimentuak garraiatu ditzaketen espazio-jaurtitzaile azpiorbitalak garatzea da.