Medikuntza eta Erizaintza Fakultatean Biomedical Engineering Mugaz gaindiko Lankidetzarako Laborategiak (LTC Sarea) antolatutako topaketa bat egin da duela gutxi. Topaketa horretan, osasunaren munduan irtenbide teknologikoak garatzeaz arduratzen diren I+G+b-ko hainbat taldetako adituak bildu ziren, Adimen Artifizialaren azken aurrerapenak eta etorkizuna, gizakiaren eta makinaren arteko harremana, hizkuntzaren prozesatze naturala eta hezkuntza medikoa jorratzeko, lankidetza horretan egindako lanak zabaltzeko eta etorkizunari eta nazioarteko proiekzioari begira aliantzak gauzatzeko (LaNCE-Neuropharm eta ESTIA taldeak).

Euskampus Fundazioak eta Bizkaiko Campuseko Errektoreordetzak babestuta, ekimenak ardatz atlantikoan kohesio proiektu estrategikoak garatzea sustatzen du, bereziki, Akitaniaren eta Euskadiren artean; besteak beste, sinergiak sustatzen ditu Ingeniaritza Biomedikoaren eremuan.

Egunean zehar hainbat topaketa egin ziren Medikuntza eta Erizaintza Fakultatean: lehenengo saioa hurrengo proiektuetan lankidetza zabaldu nahi duten ikertzaileentzat; mahai-inguru bat Ingeniaritza Biomedikoko ikasleentzat eta, azkenik, jendaurreko saio bat Bilboko Ingeniaritza Eskolan. Hitzaldien eta eztabaiden ardatza teknologia esponentzialen interakzio aukerak izan ziren, osasun laguntza partikularizatuaren, minbiziaren pazienteen tratamendu eta laguntzaren beharrizanen eremuan.

Topaketaren ondorioen artean, adimen artifizialean egin berri diren aurrerapenek eta elkarrizketa interfazeetako ikuspegi berritzaileek kasu honetan onkologiari aplikatutako gizakiaren eta makinen arteko interakzioa nola eraldatzen ari diren ikertzeko denek duten interesa dago. Eragile birtual, adimendun eta afektibo berriek komunikazio naturalagoa eta pertsonalizatuagoa ahalbidetzen dute, gaitasun indibidualak dituzten interakzio modu integratuen bidez Helburu horretarako proposatutako azpiegitura TV over-the-top edo OTT plataformen eta aplikazioen erabilera da.

“Ikasketa sakonaren” bidez, eragile horiek pazientearen hizkuntza aztertzen dute, dialektoak, profil kognitiboa eta testuinguru emozionala kontuan hartuta. Horrela, ulermen sakona lortzen dute, eta gomendioak eta laguntza psikologiko oso pertsonalizatuak eskaintzen dituzte. Neurofeedback eta biofeedback teknikak aplikatuko dira zenbait emozio egoerei lotutako eredu zerebral eta fisiologikoak erregulatzeko. Portaera iragartzeko sistemek gerta daitezkeen birgaixotze edo tratamendu uzte aurreikusiko dituzte. Gainera, adimen kolektiboko ingurune hibridoei lotutako I+G-ko zereginak egin nahi dira, elkarlaneko OTTrako ezagutza eta transmedia eduki pertsonalizatuak partaidetzaren bidez sortzeko. Ondorioz, gizakiaren eta makinen arteko interakzioari buruzko ikuspegi berri horiek onkologia prediktibo, prebentibo eta pertsonalizatuago baten etorkizunerako oinarriak ezartzen ari dira. Horrek guztiak, gainera, e-Osasunaren eremuan ardatz atlantikoko, Espainiako eta Frantziako lurraldeen arteko kohesioa sendotzeko oinarriak ezartzen ditu.

Topaketak dagoeneko sortuta dagoen mugaz gaindiko lankidetzaren hastapena indartzeko balio izan du. Aditu horien artean, UPV/EHUko ESTIA eta LanCE-Neuropharm taldeez gain, honako hauek hartu dute parte: Valentziako Unibertsitatea, Kordobako Unibertsitatea, Atlantikoko Unibertsitate Europarra eta Valladolideko Unibertsitatea, IMDEA (Network Institute, Madril) ikergunea eta zenbait enpresa, besteak beste, VALDE Innova eta VIPScan.