Description

Maiatzaren 30ean eta 31n, astearte eta asteazkenean, Euskal Herriko Unibertsitateko Carlos Santamaría Zentroko auditorioan, Donostian, ‘Ekosistemen eta animalien aurkako kalteen erantzunak berridazten, errestaurazioaren ikuspegitik’ jardunaldia egingo da, Kriminologiaren Euskal Institutuko Gemma Varona irakasle doktoreak antolatuta. Jarduera hau ingurumenaren eta animalien aurkako delituetarako justizia errestauratiboa ikerketa-proiektuaren barruan kokatzen da: ‘Justizia errestauratiboa ingurumenaren eta animalien aurkako delituetan: prebentzio jarduketa eta erreparazio programak diseinatzea, esparru globalizatu batean'. Proiektua Zientzia Ministerioak finantzatzen du.

Bi egunez, justizia errestauratiboari buruz eztabaidatuko da, ingurumenaren eta animalien aurkako delituetan. Ekosistemei eta animaliei kalte egiten dieten benetako kasuak hautatu dira Espainiako testuinguruan, baina interes orokorrekoak globalki. Bost herrialdetako eta hiru kontinentetako (Europa, Asia eta Amerika) 50 profesional inguruk parte hartuko dute topaketan (epaileak, fiskalak, poliziak, basozainak, abokatuak, justizia errestauratiboaren bideratzaileak, ingurumenaren eta animalismoaren arloko ekintzaileak, unibertsitateko irakasleak eta justizia errestauratiboko ikertzaileak kriminologia berdearekin lotuta), eta justizia errestauratiboak kasu horietan dituen potentzialtasunei eta arriskuei buruz eztabaidatuko dute.

“Nazio Batuek honela definitzen dute justizia errestauratiboa: borondatezko eta partaidetzazko elkarrizketa-prozesu bat, eragindako kalteen erantzukizuna hartzera eta konpontzera bideratua, baterako ikaskuntzarako aukera gisa eta ez errepikatzeko berme gisa. Kasu horietan, erronka da botere-desorekak saihestea eta, larrialdi klimatikoaren testuinguruan, espezieen arteko interdependentziaren eta osasun bakar baten ikuspegia hartzea OMEk bultzatuta”, Gemma Varona irakasleak azpimarratu duenez.

Maiatzaren 30eko jardunaldia barnekoa da espezialistentzat, eta maiatzaren 31koa, berriz, publiko orokorrarentzat, 15:30etik aurrera. Bertan, tailerreko parte-hartzaileek lanbide arteko eta diziplina arteko eztabaidaren emaitzak emango dituzte, bertaratutakoekin eztabaidatzeko. Ez da beharrezkoa izena ematea eta Antonio Beristain auditoriumera joan daiteke edo eztabaida online jarraitu UPV/EHUren youtube kanaletik.

PROGRAMA

Abstracts