Espainiako Zientzia Zehatzen, Fisikoen eta Naturalen Errege Akademiak (RAC, gaztelaniazko siglen arabera) Luis Vega, Euskal Herriko Unibertsitateko Zientzia eta Teknologia Fakultateko Analisi Matematikoko katedraduna, akademiko gisa sartzeko ekitaldia hartu zuen apirilaren 28an. Sarrera hitzaldian, 'Fourierren analisia eta ekuazio diferentzialak, erronka berriak' izenburupean, J. Baptiste Fourierrek 1807ko "Thèorie sur la propagation de la chaleur dans solides" lanean garatutako ideiek gaur egun oraindik duten garrantzia azpimarratu zuen. Zehazki, gaur egungo hiru erronka planteatzen dira, eta horietan aurrerapenak egin dira askotariko gaietan, hala nola mekanika kuantikoaren ziurgabetasun-printzipioetan, fluidoen zurrunbiloan eta Diracen ekuazioan, mekanika kuantiko erlatibistaren eredurik oinarrizkoena baita. 

Ekitaldian Luis Vegarekin egon ziren: Inmaculada Arostegui, Ikerketaren arloko errektoreordea; Ibon Sagastabeitia, Zientzia eta Teknologia Fakultateko jarduneko dekanoa, eta Jose A. Lozano, BCAMeko zuzendaria, besteak beste. 

Gaur egun, RACek 49 akademiko oso ditu, hiru ataletan banatuta: Matematika, Fisika eta Kimika. Vegari 41 zenbakia egokitu zaio, eta Matematika saileko UPV/EHUko lehen kidea da. Euskal Herriko Unibertsitateko beste irakasle bat ere akademikoa da, Pedro Miguel Etxenike Materia Kondentsatuaren Fisikako katedraduna. 

Luis Vega Gonzalez (Madril, 1960) egun BCAMeko Severo Ochoa de akreditazioaren ikertzaile nagusia da. Mundu guztian da ezaguna deribatu partzialen ekuazioei buruzko lanengatik, baita Fourier-en analisien ingurukoengatik ere. Halaber, 2012ko Euskadi Ikerketa Saria ere bada, eta 2015ean EURASC-European Academy of Sciences akademiak ematen duen Blaise Pascal domina jaso zuen.