Zaldun ibilkor bat

Zeruko Argia, 105 zk., 1965-02-28

      Nere irakurleek dakiten bezela Luther King eliz-artzaia ostera itzalpetua izan da egun gutxi dala. «Lider» beltzak baldintzako askatasunari uko egin dio-ta datorren astian egingo dan auzi-ikustaldiarte ezta kanpora aterako.

      Egia esan, gizon onen jokabiderik nagusiena ortan dago. Pakearen serbitzariek beste istillurik ezin erabilli dezateke, beren buruko opa ta maitasunezko joku garbia ez bada. Beren pake-naia mundu guziari azaltzeko, egiten zaizkien zigorkada ta kalte guziak biotz onez eraman bear dituzte, baita, noizean bein, presondegira ikustalditxo bat egitera joateko gerturik egon bear dute, bere indarra ortan bertan baidago.

      Ondo dakizutenez, Kijote guzien zoria hori da, munduan galtzen diran makilkada danak bere bizkarretan jasan bear izatea.

      Luther King jauna odol-garbitasunezko gaian zuritxoegi ez izan arren eta aitonen semea ez bada ere, Don Kijote galanta da, nere iritziz. Eta «cervantista» garbizaleek barkatu nazatela beltz «zikiñ» bat bere zaldun ibilkor orbangabekoarekin nahasten badut.

      Â«Parfois Don Quichotte porte aussi la soutane» idazten zuen oraindik orain Frantzian, beste gaiari jotzen ziolarik, izkiribitzaille ezagun batek. Artzai protestanteek sotanarik jazten ez badute ere gure Martiñ bere gisarako apaiza da ta lenengo hitzak berari ezarri ditzaiokegu egiari kalterik egin gabe.

      Bañan Kijoteak bi motakoak dira ta berezkunde au egitea guziz derrigorrezkoa iruditzen zaigu.

      Bai, bi motakoak dira: zentzudunak eta bestelakoak, kazkoa galdu dutenak. Egiazko Kijotea, alegia, Cervantes handiak mundu ontara ekarri zuena ta Mantxako erri ezjakiñ batean bizi ta hill zana, lenengoetakoa zan. Orain Ameriketan iskanbilletan ibiltzen dan beste hori, bigarren motakoa dugu berriz.

      Zentzugabeko Kijoteak arrotzen dituzten gudak, hiltzen dituzten errota-jiganteak eta austen dituzten etsaiak idurizkoak dira-ta aien lanak iñorentzako protxu gabe egiten dira.

      Bestelako Kijoteak egiazko munduaren gaitzen kontra jo ta ke ari dira beti ta bere lanak oso protxugarriak dira munduari bere bide onean jarraitu arazteko. Egia da, dana esateko, idurizko Kijoteak eredutzat erabilli ditezkela, mundu guziari bere zabaltasunezko ikasgaia erakusteko.

      Zenbat auzi on mundu ontan bere Kijotearen billa dabiltzanak!