EHUko Arkitektura Eskolak, beste eskola edo fakultateen modura, bere datu nagusien txostenak argitara ematen ditu, Boloniako Plana deiturikoa ezarri zenetik. Bertan, datu interesgarriak ikus daitezke. Esaterako, matrikulen azken hamarkadako bilakaera. Eta, horri dagokionez, badaude bi kontu aipagarri.

Lehen kontu aipagarria: "adreiluaren burbuila" delakoaren eztandak eragindako matrikulen beherakada dagoeneko gainditu da. Izan ere, Arkitektura Eskolako matrikuletan beherakada argia nabaritu zen 2008tik aurrera; unibertsitatean "kalean" gertatzen dena islatzen delako. Beherakada hori, dena den, ez zen bapatekoa izan: 8-9 urtez nabaritu zen, gutxika-gutxika. Bada, badirudi joera horren puntu minimoa, 2017/2018 ikasturtean jo zena soilik 101 matrikulatu berrirekin, dagoeneko gaindituta dagoela. Horren ondorioz, EHUko Arkitekturaren Oinarrietako graduan matrikulatzeko zenbait urtez korte-notarik egon ez bada ere, azken urteotan, berriro ere, berreskuratu da: 2023/2024 azken urtean, esaterako, 9,6 bat eskatu da (14 puntutik).

Arkitektura Eskolan guztira matrikulatuak 2011-2022 epean.

Bigarren kontu aipagarria: euskarazko matrikulazioak azken urteotan errekorrak hautsi ditu. EHUko Arkitektura Eskolan 1995/1996 ikasturtean hasi zen euskarazko adarra ezartzen, hasiera batean mailaz maila, eta, maila guztietan ezarri zenetik, nahiko parekatua (zertxobait gainetik, oro har) egon da gaztelaniazko matrikulazioekiko. Hala ere, ikusgarria da azken hiru urteotako aldaketa, eta, bereziki, 2022/2023koa, zeinetan, historian lehen aldiz, oso oker ez bagaude, euskarazko matrikulek gaztelaniazkoak bikoiztu dituzten.

Arkitektura Eskolan hizkuntzaren arabera matrikulatuak 2011-2022 epean.

Orain ikuskizun dago ea aipatutako bi joerek jarraikortasuna edukiko duten datozen urteotan, eta horrek zer nolako ondorioak edukiko dituen.