Gazako inbasio bortitzaren erdian, 2023ko abenduan, bi irudi bolo-bolo ibili ziren sare sozialetan: "Gaza 2030" izenburuko bat, jatorri ezezagunekoa, eta, "Esna, hondartzaren ondoan etxe bat edukitzea jada ez da amets bat" lelodun beste bat, kolono sionistentzako etxeak egiten dituen Harey Zahav enpresa eraikitzailearena.

Harey Zahav eraikitzaileak 2023ko abenduan Instagramen zabaldutako irudia.

Aipatutako lehen irudia txantxa bat izan daiteke (graziarik gabekoa, dudarik gabe), Interneten batetik bestera mugitzen diren meme horietako bat. Bigarren irudia, ez hainbeste, polemika piztu ondoren hala saldu nahi izan duten arren. Irudia egin eta zabaldu duena enpresa eraikitzaile ezaguna delako, eta irudiarekin batera azalpen aski sinesgarria ere argitara eman duelako: 2005ean hustutako Gazako Gush Katif asentamendu-multzoa berreskuratu eta zabaldu nahi dute sionistek, kostaldeko eremuak irabaziz (berreskuratuz, haien arabera), 2023-2024ko inbasio gupidagabea baliatuz. Nova Katif dei daitekeen asentamendu-multzo berria, hain zuzen.

Harey Zahav eraikitzaileak 2023ko abenduan Instagramen argitaratutako beste irudia.

Gaza (bir)kolonizatzeko asmoa ez delako, gainera, enpresa eraikitzaile baten amets espekulatibo hutsa. Mugimendu sionista zabal bat dago atzean. Gero eta gehiago antolatzen ari dena: hain zuzen ere, 2024ko urtarrilaren amaieran konferentzia bat antolatu zuten Jerusalemen, "Asentamenduek Segurtasuna Dakarte" izenpean, 2005ean Gazan eta Samarian hustu ziren asentamenduak berreskuratzeko presioa areagotzeko. Eta konferentzian ez ziren eskuin muturreko soilik lau katu bildu: jende andana izan zen eta gobernuko 11-12 ministro ere izan ziren bertan.

"Asentamenduek Segurtasuna Dakarte" 2024ko urtarrileko konferentzian erakutsitako planoa.

Konferentzia horretan erakutsitako (bir)kolonizazio-planoa ikusita, ez da harritzekoa izan 2024ko maiatzean argitaratu den "Gaza 2035" txostena, zeinetan, oraingoan bai, Israelgo gobernuak esku-hartze zuzena eduki omen duen (egiaztatu ez duen arren). Lau haizetara zabaldu den Gaza berriko irudiak, adimen artifizialaz egindakoa, noski, argi uzten du Gaza berria nazioarteko negozio-metropoli bihurtzeko sionistek duten asmoa.

Gaza 2035 txosteneko irudia, adimen artifizialaz egindakoa.

Gaza berri horretan palestinarrek ere lekurik edukiko ote duten ikusteko dago. Zeren eta, zoritxarrez, orain arteko zantzuak ez dira batere baikorrak, eta gehiago ematen du giza-ordezkatze masibo baten atarian gaudela. Eta horrek XX. mendeko beste kolonizazio-plan ilun bat ekartzen digu gogora, distantziak distantzia: naziek Europako ekialdean aurrera eraman nahi izan zutena.