Atzoko EHUko errektoreordetzarako hauteskundeen emaitzaz irakurketa asko egin daitezke, baina hemen eta orain kontu zehatz batean zentratuko gara: Arkitektura Eskolako parte-hartze baxuan. Zenbatekoa izan da? EHUko batez bestekoa baino baxuagoa?

Bada, bai. Alde batera utzita Teknikariak eta Kudeaketako eta Administrazio eta Zerbitzuetako Langileak (TEKAZEL), datuak ez dauzkagulako beste hautes-mahai batean bozkatzen zutelako, Arkitektura Eskolan irakasleen eta ikasleen boto gutxiago jaso ziren atzo gainerako EHUko zentroetan baino. Zehazki, bi estamentutan jaso dira boto gutxiago: doktore iraunkorren partetik eta ikasleen partetik.

Zenbakietan jar dezagun baieztapen hori. Emaitza zehatzez harago (eta emaitzetarako erabiltzen den ponderazio-sistema klasista samarra alde batera utzita), hauek izan ziren atzoko hauteskundeetako partaidetza-zifra orokorrak, EHU osoan:

-Doktore iraunkorrak: 2.326tik 1.937k eman zuten botoa (% 83,28ko parte-hartzea).

-Doktore ez-iraunkorrak eta iraunkor ez-doktoreak: 1.649tik 927k eman zuten botoa (% 56,22ko parte-hartzea).

-Gainerako irakasle eta ikertzaileak: 1.801etik 571k eman zuten botoa (% 31,7ko parte-hartzea).

Alegia, EHUko 5.776 irakasle eta ikertzaile guztietatik 3.435ek eman zuten botoa (25 baliogabeak ere barne hartuz): alegia, EHU osoko irakasleen eta ikertzaileen parte-hartzea % 59,47koa izan zen.

Ikasleei dagokienez, 42.837tik 6.270k eman zuten botoa: alegia, EHU osoko ikasleen parte-hartzea % 14,64koa izan zen.

Atzoko hauteskundeetako Arkitektura Eskolako hautetsontzi bat.

Eta Arkitektura Eskolako hautes-mahaiari dagokionez, hauek izan ziren partaidetza-datuak:

-Doktore iraunkorrak: 27tik (denak Arkitekturakoak) 17k eman zuten botoa (% 63ko parte-hartzea).

-Doktore ez-iraunkorrak eta iraunkor ez-doktoreak: 62tik (horietatik 14 Enpresa Eskolakoak zirela) 36k eman zuten botoa (% 58,06ko parte-hartzea).

-Gainerako irakasle eta ikertzaileak: 54tik (horietatik 14 Enpresa Eskolakoak zirela) 21ek eman zuten botoa (% 38,89ko parte-hartzea).

Alegia, Arkitekturako hautes-mahaiko erroldako 143 irakasle eta ikertzaile guztietatik 74k eman zuten botoa (baliogabe bakarra ere barne hartuz): alegia, Arkitekturako hautes-mahaiko irakasleen eta ikertzaileen parte-hartzea % 51,75ekoa izan zen.