Eva Ferreira katedraduna hautatu dute gaur, azaroak 26, UPV/EHUn egin diren errektorea aukeratzeko hauteskundeetan. Ferreirak lortu du emandako botoen % 66,24. Unibertsitateko kideek hautatzen dute errektorea, sufragio orokor haztatuaren bidez. Hautagai bakarra egon denez, hautatua izateko, emandako botoen herena lortu behar zuen egin beharreko haztapenak eginda.

Sektoreka emaitzak hauexek izan dira:

• Lotura iraunkorra duten 2.114 irakasle eta ikertzaile doktoreetatik 1.404k bozkatu dute (919  aldeko boto, 469  zuri).
• Lotura iraunkorra duten 179 irakasle eta ikertzaile ez-doktoreetatik 91ek bozkatu dute (52 aldeko boto, 38 zuri)-
• Gainerako 3.273 irakasle eta ikertzaileetatik 642 bozkatu dute (383 aldeko boto, 251 zuri).
• 40.819 ikasleetatik 857k bozkatu dute (612  aldeko boto, 218 zuri).
• Administrazio eta Zerbitzuetako Pertsonaleko 1.896 kideetatik, 744k bozkatu dute (433 aldeko boto, 302 zuri).

Botoa honela haztatzen da: irakasle doktore iraunkorrei % 56,25 dagokie; irakasle iraunkor ez-doktoreei, % 7,50; gainerako irakasle eta ikertzaileei, % 2,09; ikasleei % 22,08; eta, azkenik, administrazio eta zerbitzuetako langileei, % 12,08. Beraz, botoak haztatu ondoren, hauexek dira emaitzak:

• IRI doktore iraunkorrak: % 37,24 aldeko boto eta % 19,01 zuri.
• IRI ez doktore iraunkorrak: % 4,33 aldeko boto eta% 3,17 zuri.
• Bestelako IRI: %1,26 aldeko boto eta % 0,83 zuri.
• Ikasleak: % 16,28 aldeko boto eta  % 5,80  zuri.
• AZP: % 7,12 aldeko boto eta % 4,96 zuri

Emaitzen behin betiko aldarrikapena abenduaren 4an egingo da, inpugnazioak aurkezteko epea igaro ondoren.

Eva Ferreira doktorea (Barakaldo, 1963) Ekonomia Aplikatuko katedraduna da, eta Ekonomia eta Enpresa Fakultateko irakaslea. UPV/EHUko Ekonomia Gaietako eta Ikasketa Antolaketako errektoreorde (2004-2008), unibertsitate bereko idazkari nagusi (2009-2012) eta Euskal Unibertsitate Sistemaren Kalitate Agentziako zuzendari (Unibasq, 2015-2019) izan da.  Kargua urtarrilaren lehen hamabostaldian hartuko duela aurreikusten da, karguan Nekane Balluerka ordezkatuz. Balluerka izan da hautatutako errektorea izan zen lehen emakumea.