Joan den ostiralean, martxoaren 14ean, ospatu zen UPV/EHUko Eztabaida Barne-Ligako finala Gizarte eta Komunikazio Zientzien Fakultatean, eta bertan erabaki zen ze talde izango den gure unibertsitateko ordezkaria Gasteizen jokatuko den G9 Taldearen Unibertsitateen arteko Eztabaida Ligan: “Alerta Amarilla” taldea.

Enpresen Administrazio eta Zuzendaritza + Zuzenbidea Gradu bikoitzeko Leire Crespo, Judit Ostiategui, Julen Zhang eta Paula Ruiz ikasleek osatzen dute talde irabazlea.

Leire Crespok, taldeko kapitainak, honaino iristeko egin duten esfortzua azpimarratu du: "Egia esan, lan eta esfortzu ordu dezente jarri genituen, nahikoa prestatu genuen, gogo handia baikenuen G9an lehiatu eta talde bezala gure lehen Liga elkarrekin irabazteko". Judit Ostiateguik, bere aldetik, adierazi du, irabazteko "gogo handiarekin" zeuden arren, haien jarrera beti izan dela «irabazten ez badugu, esperientziarekin geratuko gara».

Julen Zhangek argi adierazi du gomendatuko lukeen esperientzia bat dela: "Horrelako gertaerek gogorarazten digute unibertsitatea ez dela soilik egunean lauzpabost orduz joaten zaren eta gero zure bizitzarekin jarraitzen duzun leku bat, hori baino askoz gehiago dela eta bakoitzak egiten duen unibertsitate-gradutik haratago jarduera gehiago egin daitezkeela." Eta G9ko Eztabaida Ligari begira, UPV/EHU ordezkatzeko aukera aparta dela azaldu du, "izan ere, edozeinek ezingo luke esan bere unibertsitatearen ordezkari gisa doanik unibertsitatez betetako ekitaldi batera, maila onean egongo direnak".

Ildo horretatik, Paula Ruizek azpimarratu duenez, "Liga horretan UPV/EHU ordezkatu ahal izateko aukera lortu izana saria da guretzat, eta, beraz, inolako itxaropenik gabe goaz. Ikasteko, dena emateko eta ondo pasatzeko gogoz bakarrik".

Bestalde, Fisikako ikasle Beñat Perezek irabazi zuen hizlari onenaren diploma, eta Gasteizera joango da Hizlari onenaren lehiaketan parte hartzera. Barne Ligari dagokionez, oso balorazio positiboa egin du: "Nire taldeak eta nik eztabaidaren munduarekin genuen lehen harremana zen, eta jaso genuen hurbiltasun tratua (epaileak eta beste taldeetako kideak barne) oso lagungarria izan zen hasierako urduritasun horiek gainditzeko". Diplomari dagokionez, honako hau azpimarratu du: "Ez nuen batere ez espero «Hizlari Onenaren»  diploma jasotzea! Talentu handiko hainbeste jenderen artean ez nuen pentsatu ere egin hori lortzeko aukera, Barne Ligako nire asmo bakarra ikastea eta hobetzea zen. Oso eskertuta nago G9 Ligako eztabaidaren mundu liluragarriari buruz ikasten jarraitzeko aukera izateagatik".

Bestelako sariak

• Diploma sarrera onenari: Paula Ruiz (talde irabazleko kidea). "Ez nuen batere ez espero irabaztea, nire lehen esperientzia baitzen eztabaida akademikoan parte hartzen, baina azpimarratu nahi nuke diploma lortzea ezinezkoa izango zela nire kideen laguntzarik gabe (Julen, Judit eta Leire), eta gure prestatzaile Endikaren aholkurik gabe", azaldu du.
• Diploma kontra argudio onenari: Judit Ostiategui (talde irabazleko kidea). Ostiateguirentzat ustekabea izan da diploma hori irabaztea, abenduan hasi baitzen eztabaidatzen, eta aitortu duenez, "jarrera horretan oso gustura sentitzen naiz eta gero eta gehiago gozatzen dut; beraz, noski, diploma eman zidatenean, sentimendu hori indartu egin zen".
• Diploma 2. kontra argudio onenari: Eneko Rosado. “Oso positiboa iruditzen zaigu horrelako ekintzak sustatzea unibertsitatetik eta espero dugu horrela jarraitzea epe luzez”, nabarmendu du.
• Diploma ondorio onenari: Lucia Rodriguez. Irabazleak adierazi du "bigarren eztabaida izanda, hasieran urduri" zegoela, eta "sari honek hobetzen jarraitzera eta etorkizuneko eztabaidetan parte hartzen jarraitzera motibatzen” duela.