Unibertsitateen G-9 Taldeak Batzar Nagusia egin du, eta prentsaurrekoan adierazi du harrituta dagoela Zientzia, Berrikuntza eta Unibertsitate Ministerioak adimen artifizialari buruzko ikerketarako laguntzen deialdia bertan behera utzi duelako. Deialdiak 31 milioi euro bideratu nahi zituen Europako funtsetatik arlo horretara. Ildo horretan, egoera "ezohikoa" dela adierazi dute, "hainbat ikerketa-talderen lan handia gutxiesten duena". Hori dela eta, ebazpen hori aurkaratzeko legezko bide egokiak aztertzen ari dira.

Batzar Nagusia urtarrilaren 9an eta 10ean egin zen, Oviedoko Unibertsitatean. Errektoreen bilera hainbat lan-saioen bidez egin zen, eta horietan aliantzaren etorkizuna, Campus Digital Partekatuaren funtzionamendua eta batzorde sektorialen akordioak aztertu dira.

Oviedoko Unibertsitateko errektore Ignacio Villaverdek hartu du taldearen lehendakaritza 2025eko lehen seihilekoan. Oviedoko Unibertsitatean egindako bilerak Kantabria, Errioxa, Zaragoza eta Euskal Herriko errektoreak agurtzeko ere balio izan du.

Unibertsitateen G-9 Taldea

Unibertsitateen G-9 Taldea 1997an sortutako elkarte bat da, eta beren autonomia-erkidegoetan unibertsitate publiko bakarra diren unibertsitateek osatzen dute, zehazki hauek: Kantabriako Unibertsitatea, Gaztela-Mantxako Unibertsitatea, Extremadurako Unibertsitatea, Balear Uharteetako Unibertsitatea, Errioxako Unibertsitatea, Oviedoko Unibertsitatea, Euskal Herriko Unibertsitatea, Nafarroako Unibertsitate Publikoa eta Zaragozako Unibertsitatea, bai eta Murtziako Unibertsitatea eta Burgosko Unibertsitatea ere, azken biak entitate laguntzaile gisa.