Makina Erremintako Gela 2008an inauguratu zuten. Bertan, makina-erremintaren diseinuaren, kontrolaren eta erabileraren gaineko prestakuntza aurreratuko plan bat garatzen dute. 230 orduko mintegi bat eta sektoreko enpresetan lankidetza-praktikak ere eskaintzen dituzte. Gelan Makina-erremintan Aditua UPV/EHUko titulu propioa ematen da.

Gelaren finantziazioa, Makina Erremintaren Fabrikatzaileen Elkartearen (AFM) laguntzarekin, Bizkaiko Foru Aldundiko Ekonomia Sustapenerako Sailaren esku dago.

Gela lankidetzan aritzen da prestakuntzako nahiz ikerketako beste zentro batzuekin eta enpresekin. Beraz, tresna eraginkorra da, Bilboko Ingeniaritza Eskolako ikasleak euskal ekonomiarako hain garrantzitsua den sektore honen berrikuntzan prestatzeko, baita eskolaren, bertako sailen eta makina-erremintako enpresen eta erabiltzaile nagusien (hau da, automozioa, aeronautika, energia, etab.) arteko lankidetza-ildoak irekitzeko ere.

Ikasleek enpresatan egiten dituzten proiektuak ezinbestekoak dira euren prestakuntza osorako. Proiektu horietan, helburua ikasleek mintegietan barneratutako ezagutzak praktikan jartzea da. Krisi-garaian egon arren, zenbait enpresa eta zentro teknologikok Gela honetako ikasleak hartu dituzte, eta aukera eman diete ikasleoi karrera amaierako proiektua egin eta bertan lanean jarraitzeko. Urte honeek igarota, Ikasle asko ari dira lanean inguruko manufaktura-enpresatan, prestakuntza ona baitute eta eskaera handia baitago Euskal Herrian hain garrantzitsua den arloan.

Aitzol Lamikiz <aitzol.lamikiz@ehu.eus>
Soraya Plaza <soraya.plaza@ehu.eus>