Deskribapena

John Parsons, ibilbide profesional luzeko gitarrista eta gaur egun Rock & Rios (Miguel Ríos) birako kidea, Bilboko Ingeniaritza Eskolaren Guitar Stream proiektuak antolatutako jardunaldian parte hartuko du.

"Guitar STREAM - John Parsons. A long long road, una vida trasteando con seis cuerdas" izeneko topaketan, britainiar gitarristaren ibilbide profesionalaren errepasoa egingo da, bere ibilbide luzearen hainbat kantu adierazgarri interpretatuz, Bilboko Ingeniaritza Eskolako Guitar STREAMeko taldeak sortutako gitarrekin.

Topaketa zabalik, edukiera bete arte.

John Parsons

Musika ikasketak egin zituen Leeds College of Music-en (West Yorkshire, Ingalaterra), eta bertan Acoustic Alchemy taldeko Nick Webb musikaria ezagutu zuen. Garai hartan Sergio Castillo, Tato Gómez, Paco Saval eta Serge Maillardek osatzen zuten She 's French taldean batu zen. 1977 eta 1990 artean Kolonian bizi izan zen, Alemania, eta Santiago taldea sortu zuen Tato Gómez, Paco Saval, Serge Maillard eta Mario Argandoñarekin batera. Acoustic Alchemyrekin berrogeita hamar abesti baino gehiago konposatu zituen, eta bi Grammy izendapen jaso zituen New Age Abesti Onenarentzat 1997an.

1990etik Espainian bizi da, eta 1981az geroztik Espainiako artistekin kolaboratu du, Rock and Ríos taldeko kide izan da Miguel Ríosekin batera, eta lan hori 1982ko martxoaren 5ean eta 6an grabatu zuen. Juan Perro, Luz Casal, Joaquín Sabina, Javier Ruibal, Antonio Flores, Pedro Guerra, Álex Ubago, Alejandro Sanz eta David Garrido Guil-ekin lan egin du. 2004. urtean Miguel Ríosen 60 Mp3 diskoa ekoitzi, konposatu eta moldaketa musikalak egin zituen, 2004ko Musikaren Sarietan Rock Disko Onenaren saria jaso zuena. Bere aintzatespenen artean daude Grammy sarietarako bi izendapen 'Acoustic Alchemy' taldeko ekoizle eta konpositore gisa, eta Akademia Music Awards sari bat Estatu Batuetan, David Garrido Guil konpositorearekin batera, 2021ean 'Secuencias' diskoagatik.

Guitar STREAM proiektua

Guitar STREAM proiektua Bilboko Ingeniaritza Eskolan sortu zen 2018an, eta gitarra elektrikoak eraikitzea du helburu, asmo bikoitzarekin: proiektuetan oinarritutako ikaskuntza unibertsitateko ikasleen prestakuntzan aplikatzea eta unibertsitate aurreko ikasleen artean STEAM bokazioak sortzea.

Gaur egun, Guitar STREAM proiektua 5 irakaslek eta laborategiko 2 teknikarik osatzen dute. 2022-23 ikasturtean, 3 ikasle izan dira etengabe, eta beste 3, puntualki, proiektuan. Sei ikasle horien graduak Industria Teknologiako Ingeniaritza, Industria Elektronikako eta Automatikako Ingeniaritza eta Industria Antolaketa dira.

Ekimena zabalik dago, halaber, gradu hauetako ikasleentzat: Industria Teknologiako Ingeniaritza, Ingeniaritza Elektrikoa, Ingeniaritza Mekanikoa, Industria Elektronikako eta Automatikako Ingeniaritza, Telekomunikazio Teknologiako Ingeniaritza eta Industria Antolakuntzako Ingeniaritza. Horiek guztiek ikasgeletan eta laborategietan eskuratutako ezagutzak aplikatu ahal izango dituzte proiektu honetan.

Guitar STREAM proiektua " % 100eko STEAM ekimentzat" hartu du Eusko Jaurlaritzako Hezkuntza Sailak, Innobasque Berrikuntzaren Euskal Agentziarekin lankidetzan.

Ikasturtean zehar, Guitar STREAMek jarduera aipagarri hauetan parte hartzen du:

• Ikasleen Kontseiluak egindako Elkarteen Azoka
• Ate Irekien Jardunaldia, Ingeniaritza Elektrikoko graduko standaren zati gisa.
• STEM jarduerak DBHko 4. mailako ikasleekin.
• Jarduera praktikoak batxilergoko 1. mailako ikasleekin.
• Innobasqueko STEAM sareak sareko jarduerak batxilergoko 2. mailako ikasleekin.
• Guitar STREAM jardunaldiak.