UPV/EHUko Carlos Santamaria Zentroan, mugikortasun programetan parte hartzen duten ikasle bisitariei agur esateko ohiko ekitaldia egin da. Hainbat herrialdetako ehun gaztetik gora izan dira ekitaldian, Bizkaiko, Arabako eta Gipuzkoako campusetakoak.

Argazki ofiziala atera ostean, Graduondoko Ikasketen eta Kanpo Harremanen errektoreorde Nekane Balluerkak eta Gipuzkoako Campuseko errektoreorde Ana Arrietak hasierako agurra egin dute, eta eskerrak eman dituzte UPV/EHU hautatzeagatik truke egonaldia egiteko.

Nazioarteko ikasleek UPV/EHUn eta Euskal Herrian izan dituzten bizipenen berri eman dute. Gero, Kepa Junkera musikari eta konpositore ezagunak Euskal Herriko musika tresna tradizional batzuei buruzko masterclass bat eman du.

Erasmus+ programa mugikortasun akademikorako esparru ezin hobea da; izan ere, master eta doktoregoko mailetara ere zabaldu da, bai eta Europatik kanpoko herrialdeetara ere. Bestalde, UPV/EHUk nabarmen handitu du ingelesezko irakaskuntzaren eskaintza, hala graduan nola masterrean. Era berean, nazioz gaindi lankidetzan aritzeko beste modu batzuk ezarri dira; besteak beste, tesiak elkarlanean zuzentzea eta ikerketa proiektuak beste herrialde batzuetako kideekin egitea.

Europako guneaz harago, ordea, garatzen ari da Master eta Doktoregoen Latinoamerikako Sarea; 13 herrialdetako 15 unibertsitatek osatzen dute, eta lankidetza proiektu berriak abiarazi dira, Ipar Amerikako, Errusiako eta Asiako erakunde entzutetsuekin elkarlanean.

Argazkiak: Laura Lopez. UPV/EHU