Nazioarteko hogei unibertsitatetako baino gehiagotako 27 ordezkari Euskal Herriko Unibertsitatean izan dira bisitan, unibertsitateko Nazioarteko Harremanen Bulegoak antolatzen duen langileentzako prestakuntzako seigarren astearen esparruan (Staff Training Week-STW).

Euskal Herriko Unibertsitateko hiru campusak bisitatu dituzte, eta Europatik (Italia, Frantzia, Alemania, Belgika, Erresuma Batua, Portugal, Eslovenia, Eslovakia, Estonia, Suitza, Suedia eta Grezia) eta munduko beste herrialde batzuetatik (Kanada eta AEB) etorri dira. Europaz kanpoko herrialdeetako bost parte hartzaileak herrialde elkartuekiko mugikortasuneko proiektu baten –UPV/EHUk kudeatzen du– Erasmus+ finantzaketarekin etorri dira gurera.

Topaketaren helburua da ikasleen eta irakasleen nazioarteko mugikortasunarekin lotutako gaietan sakontzea, bai eta parte hartzen duten unibertsitateen artean jardunbide egokiak partekatzea eta ikasleentzako eta langileentzako truke aukera berriak sortzea ere.

Zehazki, honako gai hauetan sakondu dute aurten: inklusioa eta aniztasuna nazioarteko mugikortasunean; COIL eta Erasmus+ BIPs ikastaroak; ikaslearen txartel europarra; EGRACON notak konbertitzeko sistema; eta jasangarritasuna nazioarteko mugikortasunean. Inklusioari eta aniztasunari buruzko saioan behar bereziak dituzten hiru ikaslek parte hartu zuten. Graduko ikasketetan beste unibertsitate batzuetan izandako mugikortasun esperientzien berri eman zuten.

Euskal Herriko Unibertsitateak jada baditu aldebiko hitzarmenak unibertsitate horietako gehienekin, eta espero da bisitak horiekin dauden loturak indartzeko balio izatea. UPV/EHU, bere aldetik, oraindik loturarik ez duen unibertsitateekin hitzarmen berriak egiten saiatuko da.