DESKRIBAPENA

Gaur egun, bizi garen eta lan egiten dugun eraikinetan, zaratak arazo eta kalte ugari sortzen ditu. Zarataren jatorria eraikinaren kanpoaldean zein barnean egon daiteke.

Atal honetan, etxebizitzetako zarata aztertuko dugu batez ere. Normalean arazoa bikoitza izaten da: alde batetik gure inguruak sortzen duen "hondoko zarata", askotan oharkabean berarekin bizitzera ohituta egoten garena, eta beste aldetik auzokoek momentu konkretuetan egindako aktibitate zaratatsu ezatseginak eta ezerosoak. 

Gelen artean soinua transmititzeko bideak

Eraikinetan soinua transmititzeko bide ugari dago: sabaiak, hormak, zoruak eta eraikinaren egitura bera. Transmisio-bideak zuzenak izan daitezke, hau da, justu alboan dauden gela biren artekoak, ala zeharkakoak ere izan daitezke, hau da, urrutiagoko gela ezberdinen artean.

Idealena izango litzateke, eraikin bateko solairu bakoitza unitate independentea balitz eta solairu horrek gainerako solairuekin duen kontaktua guztiz malgua edo flexiblea balitz. Praktikan ezinezkoa da baina ahal den neurrian, elementu flexibleak erabil daitezke, zoru flotatzaileak, sabai malguak eta abar.

Sabai malgu bat eskegitzen bada zuzeneko transmisioa (zoruan zehar) asko murrizten da, baina zeharkako transmisioa (alboko bideetan zehar) ez du murrizten, hurrengo irudian adierazten den bezala. Zoru flotatzaileak ordea zuzeneko eta zeharkako transmisio-bideak murrizten ditu, zoru horretan zehar behintzat. 

Soinuarentzat beste transmisio-bide ezberdin bat eraikinaren zirrikituak eta zuloak dira, eta soinuaren eskapea deritzo. Eraikinen eskape ohizkoenak dira  hormetako zirrikituak, leihoen eta ateen ertzen inguruak, irekiguneak, igeltsuzko xaflen arteko hutsuneak eta abar. Eskapeak ezabatzeko prozedura  normalena da hormetako, sabaiko eta zoruko zuloak, hutsuneak, eta zirrikituak itxi eta konpontzea.

Banaketa konposatuak

Banaketa bat (horma bat, sabai bat, zein zoru bat) ez bada egokia soinu-transmisio handia eduki dezake. Banaketa batek elementu ezberdinak baditu,  isolagarritasun-maila ezberdineko elementuak alegia, banaketa konposatua deritzo (adibidez, horma batek ateak edo leihoak baditu). Kasu honetan isolamenduaren balio osoa kalkulatzeko elementu bakoitzaren isolamendua kontutan eduki behar da.

Gela baten edo etxebizitza baten isolamendua hobetu nahi bada, adibidez hormetako materiala aldatuz, lehenik azterketa zehatz bat egin behar da, ea gelak eskapeak ote dituen, zirrikitu edo hutsuneak, elementu ezberdinetako banaketak eta abar, eta edozein aldaketa egin aurretik soinu-isolamenduaren azterketa burutu behar da.

ADIBIDE ETA SIMULAZIOAK

Banaketa baten transmisio-koefiziente osoaren kalkulua: Azalera osoa 25m² eta ondoko elementuak

GALDERAK

a Etxebizitzetara sartzen diren zarata posibleetatik, hauetako bat ez da eraikinetik kanpokoa

1. inguruko saltokiak

2. etxebizitzako bertako aparatuak.

3. auzoko trafikoa

4. errepideko obrak

b Nola murriztu daiteke zeharkako transmisioa zoruan zehar?

1. zoru flotagarri bat ipintzen

2. zirrikituak konpontzen

3. zuloak estaltzen.

4. sabai malgu bat eskegitzen

c Zer da soinuaren eskapea?

1. zirrikituen artetik propagatzen dena

2. airetik propagatzen dena

3. zeharkako transmisio-bideetatik propagatzen dena

4. edozein transmisio-bidetik propagatzen dena

d Banaketa konposatu baten adibide bat.

1. horma bat ate bat eta leiho bi dituena.

2. horma bat parean leiho bi dituena.

3. horma bat parean ate bat eta leiho bat dituena.

4. horma bat parean ate bat duena.

e Horma baten neurriak 3m x 4m dira baina ate bat du, 1m x 2m neurrikoa. Hormaren transmisio-koefizientea 10^-5 da. Banaketa osoaren transmisio-galera 46 dB bada, zein da atearen transmisio-koefizientea?

1. 10^-5

2. 10^-4

3. 5 x 10^-4

4. 10^-3

  Emaitzak:  a2   b1   c1   d1   e2  

MULTIMEDIA ETA WEB BALIABIDEAK

Gai honetaz gehiago irakurri nahi baduzu, ondoko estekan erreferentziak aurkituko dituzu:   , eta gero honako atalean  .