DESKRIBAPENA

Aretoen diseinu akustikorako erabiltzen diren zenbait irizpide ikusiko ditugu. Hasteko, aretoaren tamaina eta forma erabaki behar dira, eta irizpide estetikoak eta akustikoak ez daitezela aurkakoak izan. Aretoaren aforoa erabaki ondoren bere neurri guztiak erabaki behar dira erreberberazio-denboraren arabera.

Entzulegoari soinua modu homogeneoan transmitituko dion gainazal handiena sabaia da. Bere altuera funtsezkoa da, aretoaren bolumena mugatzen duelako eta soinua entzulegoraino modu egokian transmituko ote den erabakitzen duelako. Kontzertu-aretoetan orkestraren atzealdean xafla islatzaile bat kokatu ohi da (tornaboza) eta sabaian ere panel islatzaileak kokatuz soinua entzulegorantz bideratzen da.

Auditorioaren zoruak forma egokia behar du entzuleen buruetan gertatzen den soinu-difrakzioaren fenomenoa mugatzeko. Froga daitekeenez, entzule bakoitzaren eta eszenatokiaren arteko ikusi-lerro zuzena lortzen denean, ikusmenaz gain, entzumena ere hobetzen da. Irizpide honi segituz, auditorio baten zoruaren forma ideala, entzuleen eta eszenatokiaren arteko ikusi-lerro zuzena lortzeko, espiral logaritmikoa da, eta horregatik erabili ohi dira kurba honen hurbilketak.

Areto baten ezaugarri akustikoetan eragina duten faktoreak

Badaude zenbait faktore areto baten ezaugarri akustikoetan eragina dutenak. Batzuk irizpide objektiboetan dute oinarri, baina beste batzuk ordea faktore "neurtezinak" dira, horregatik ez dago adostasun osorik akustika on bat lortzeko zeintzuk izan behar diren balio konkretuak.

Akustika egoki bat lortzeko arauak

Arkitekturaren akustika ez dago guztiz garatuta eta bukatuta, irizpide subjektiboetan eta irizpide estetikoetan oinarritzen baita. Neurketa eta esperimentu ugariak egin diren arren, ez dirudi erraza areto baten ezaugarri akustikoen balio definitiboak konkretatzea, aretoaren ezaugarri guztiak akustikaren ikuspegitik egokiak izan daitezen. Hala ere, badaude bete beharreko arau minimo batzuk.

Ez da erraza arau hauek guztiak biltzen dituen aretoa eraikitzea, eta horregatik ez dira asko benetan onak diren auditorioak, batzuetan diseinu kaxkarren erruz, eta beste batzuetan auditorioak erabilpen baterako diseinatuak izan diren arren, beste erabilpenetarako erabiltzen ohi direlako.

ADIBIDE ETA SIMULAZIOAK

Defektu akustikoak eta kapritxozko formak

Areto batean sarritan, oihartzunak norabide ezegokietan bideratzen dira gainazal planoak ez daudelako ondo orientatuta, edo gainazal ahurrak direlako, soinuak puntu batzuetan kontzentratzeko joera izaten du. Oso efektu ezerosoa gertatzen da gainazal plano bi, islatzaileak biak, aurrez aurre kokatzen direnean. Horma bi hauen artean sortutako soinua bi hormetan islatzen da aldi berean, eta bibrazio baten antzeko oihartzuna ekoizten dute. Horma biak material zurgatzailez estaliz efektu hau ekiditen da.

Gainazal ahurretarako, soinu-iturritik hormarainoko distantzia eta kurbadura-erradioaren arabera, fokatze- edo dispertsio-efektuak gertatzen dira horman islatutako uhinetan. Horregatik orkestra bat horma ahur baten parean kokatzen denean, gerta daiteke instrumentu-multzo bakoitza norabide ezberdin batean islatzea, edo fokatze efektuagatik, aretoko puntu batzuetan soinuaren intentsitatea oso handia izatea eta besteetan ordea motelegia. Efektu hauek zenbait eraikin entzutetsuetan ere gertatzen dira, adibidez, oso ezaguna da Londresko San Paulo katedraleko "xuxurlen galeria".

GALDERAK

a Musika-areto bat diseinatzeko:

1. irizpide estetikoak dira soilik kontutan hartu beharrekoak

2. irizpide akustikoa ez da kontutan hartu beharrekoa

3. irizpide estetikoak eta akustikoak kontutan hartu behar dira

4. irizpide estetikoak ez dira kontutan hartu behar

b Zein da entzulegoari soinua modu homogeneoan transmitituko dion gainazal handiena?

MULTIMEDIA ETA WEB BALIABIDEAK

Gai honetaz gehiago irakurri nahi baduzu, ondoko estekan erreferentziak aurkituko dituzu:   , eta gero honako atalean  .